Mark 4

A warwara larlar ana tena omomai

(Mt 13:1-9; Lk 8:4-8)

1E Iesu i tur ulak pas a asasaer tumokorot na puka tasi. Pa a tnan kunum a tarai la hanot teteki. Pa, i kas ana mon pa i kes ono sa na puka tasi. Atnan kunum a tarai rop la tur tumokorot. 2Pa i asaer la ana galis a utna ana warwara larlar. I asaer la mange, 3“Longor! A tena omomai i han sur ir sapran a pat a witla. 4Ning i sapran amoni, dingla na patna i punga ting na ngas pa a manila la hanot pa la ieni. 5Dingla la punga ting na piu ning i hatat, ning a piu bel i but, pa la gomgomo kapit, anasa a piu bel i but. 6Ika ning a kamis i sasai, la main pa la marang rop, anasa belal wakwakirna. 7Dingla na patna la punga tar ting na tinine rosrosla, pa a rosrosla la gomo ot pa la rau akes la, pa bel la wai. 8Pa dingla na patna otleng la punga tar ona wakak a piu. La gomo pa la itna amon pa la wai, dingla natol a bonot a patna, dingla diono na bonot, pa dingla takai a mar.” 9Lamur e Iesu i mang, “Esining a talngana, i wakak sur ir longor ono.”

E Iesu i asaer ana warwara larlar tetek a tarai rop

(Mt 13:10-17; Lk 8:9-10)

10Ning e Iesu kama taum ana ning a bonot pa pisir naur a kakak a asasaer pa dingla na tarai la kes, la dekeni ana warwara larlarla. 11Pa i atai la mang, “E God ka saran tar a mananos tetek mulo sur mulor tasman a utna na pidik ana nuna matanitu. Ika tetek a tarai masik, dir asaer la ona utnala rop ana warwara larlar, 12sur,

‘lar oroi pa lar oroi, ika bel lar oroi lalani,
lar longori pa lar longori, ika bel lar longor lalani,
pa bel lar mananos ono.
Nadek ning lar oroi lalani pa lar mananos,
pa, lar ulak tetek e God, pa ir kepsen a toltol laulau anunla.’”

E Iesu i pak a kamkama warwara larlar ana tena omomai

(Mt 13:18-23; Lk 8:11-15)

13Pa e Iesu i deken la mange, “Bel mulo talapor ana kamkama warwara larlar ne? Mulor tasman mangamangasa a kamkama ana dingla na warwara larlar otleng? 14A tena omomai i arlar ana tena warawai ning i asaer ana warwara ane God. 15A pat a wit ning la punga ting na ngas, la arlar ana tarai ning la longor tar a warwara, pa e Satan i hanot, pa i kepsen a warwara miting na balanla. 16Dingla na tarai otleng la arlar ana pat a wit ning i punga ting na piu ning i hatat. Ning la longor a warwara la tong akesi ana gasgas. 17Ika a warwara bel i kes ting na balanla, bel lar tur rakrakai arlar ana wit ning belal wakirna. Ning a mamahatla i pastetek la pa di alaulau la ana warwara ning la tortorot ano, la punga kapit. 18Dingla na tarai la arlar ona pat a wit ning la punga ting na tinine rosrosla. La longor a warwara, 19ika a nuknukla mitelapiu, pa nuknuk otleng ana nunla na gongon ning i asongo a nuknukinla, pa a nemnem sur a ututnala masik, la rau akes a warwara ane God, pa bel la wai. 20Dingla na tarai la arlar ana pat a wit ning la punga ana wakak a piu. La longor a warwara pa la muri, pa la wai, dingla na tarai natol a bonot, dingla na tarai diono na bonot, pa dingla na tarai otleng takai a mar.”

A warwara larlar ana lam

(Lk 8:16-18)

21Pa e Iesu i atai la mange, “Bel tik ir los pas ta lam pa ir aroh alari ana paket, pa bel ir sua i ting na hailogo. Belal! Ir sua i ot ting ana nuna turtur. 22A utna rop ning i mumun, lamur ir hanot talapor. Pa a ututna rop ning di bunuri, lamur dir tasmani. 23Esining a talngana, i wakak sur ir longor ono.” 24E Iesu i atai la mange, “Mulor nuknuk wakak ana sa ning mulo longori. Ning mulor longor wakak, dir saran a wakak a tastasman ta mulo. Pa mulor kubasi ir itna kol. 25Tik ning ir tong akes anuk a asasaerla, dir tabar aulaki ana wakak a nuknuk, pa tik ning bel i tong akes anuk a asasaerla, dir kepsen otleng anuna siklik wakak a nuknuk kusuni.”

A warwara larlar ana pat a witla ning la gomo

26E Iesu i atongi otleng mange, “A matanitu ane God i arlar ana barsan ning i sapran tar a pat a witla ting na kabalapiu. 27Ning i borbor ana moromla pa i sira mata ana kabakiarla, a pat a wit la pusa ot pa la gomo, pa a barsan bel i tasmani mang la pusa ot pa la gomo mangmangasa. 28A piu ot i agomo a rakai a wit larne: a pakana i pusa nigo, pa lamur a sarna i gomo ot, pa a patna i mur ot. 29Ning a patnala ka makos pa a kalang a sol ka hanot, a barsan ir pirat pas la.”

A warwara larlar ana pat a mastad

(Mt 13:31-32, 34; Lk 13:18-19)

30E Iesu i atai la mange, “Ar larlar a matanitu ane God ana sa? Pa esi na warwara larlar ar papak ono? 31I arlar ana pat a mastad. I natarna kol tana pat a rakai rop, ning di omani ting na kabalapiu. 32Ning di ka oman tari, pa i gomo, ir itna kol kusun a rakai a hangan rop pa i sua sarara a tatatnan rakrakana, pa a manila lar tol pios ana rakrakana ning i molmol.”

33E Iesu i warwara tetek la ana galis a warwara larlar ning i arlar ana nunla na mananos, 34pa bel i warwara tetek la ana ta warwara masik, a warwara larlar rop ot. Pa ning la kama taum ana nuna kakak a asasaer lar kes, ir papak bot ana kamkama warwara larlarla.

E Iesu i sairas a top pa a wuwu

(Mt 8:23-27; Lk 8:22-25)

35Ning a rah ma ana pukakiar ning, e Iesu i atai anuna kakak a asasaerla mange, “Dalar han lakai utumo na ris a puka tasi.” 36La kas tetek e Iesu ting na mon, pa la han kusun a kunum a taraila. Pa dingla na mon otleng la han taum on la. 37Pa a rakrakai a wuwu i hanot, pa a top i song a mon pa siklik ir murung. 38E Iesu i borbor tumo lamur ana mon pa i ululnge ana pilo. A kakak a asasaer la amata i, pa la atai i mange, “Tena Asaer, dala kar hirua! Mangmangasa, bel u ngara on dala?” 39Pa i kamtur, i sairas a wuwu, pa i atai a top, “Ur manah! Ur mililo.” Pa a wuwu i manah pa a tasi i mililo kakat. 40E Iesu i atai la mange, “Sur asa ning mulo matmataut? I mangasa, belot mulo tortorot?” 41La matmataut kol, pa la deken artalai la mange, “Esi na ngas a barsan ne, sur a wuwu pa a top diar longor tana?”